SAVALAN – ASPI Winery şirkəti IWSC 2025 (International Wine and Spirit Competition) beynəlxalq müsabiqəsində yeni mükafatlara layiq görülüb.

Bu il 90-dan çox ölkədən 12.000-dən artıq şərab və spirtli içki nümunəsi Londonda sahənin aparıcı ekspertləri tərəfindən qiymətləndirilib. Dequstasiya nəticələrinə əsasən:

SAVALAN Grappolo qızıl medal qazanaraq 95 bal toplayıb. Ekspertlər içkinin qovun və ingilis qızılgülü notları ilə təzə ətrini, qurudulmuş ərik və sərin daş çaları olan mürəkkəb dadını, eləcə də çoxqatlı və zərif son dadını yüksək qiymətləndiriblər.

SAVALAN Armud Arağı bürünc medal qazanıb və 87 bal toplayıb. Ətirdə otlu və torpaq notları, dadda isə armud və yüngül ballı çalarlar, həmçinin ağac tonları hiss olunur.

SAVALAN Tut Arağı da bürünc medal alaraq 89 bal toplayıb. Münsiflər heyəti onun gavalı ətrini, yumşaq və şirin dadını, eləcə də təmiz, tum meyvələri notlu son dadını xüsusilə qeyd ediblər.

IWSC şərab və spirtli içkilər sahəsində dünyanın ən nüfuzlu beynəlxalq müsabiqələrindən biri hesab olunur. Bu mükafatlar Azərbaycan distillələrinin beynəlxalq arenada əldə etdiyi yüksək keyfiyyət səviyyəsini əks etdirir. Zamanla sınaqdan keçmiş ənənəvi istehsal üsulları dünya səviyyəli ekspertlər tərəfindən peşəkar şəkildə tanınıb.